Kuvendi i Kosovës mblidhet sot në orën 09:00 në një seancë të jashtëzakonshme plenare, me 22 pika në rendin e ditës. Në qendër të diskutimeve do të jenë ndryshimet në Ligjin për Dhomat e Specializuara dhe Zyrën e Prokurorit të Specializuar.
Seanca pritet të shoqërohet me një protestë përpara Kuvendit, të thirrur nga Organizata e Veteranëve të Luftës, e cila kërkon miratimin e projektligjit. Sipas gazetares së Top Channel, Leonita Bajrami, protestuesit kanë qëndruar gjatë natës përballë ndërtesës së Kuvendit.
Shqyrtimi i projektligjit është parashikuar fillimisht në orën 08:00 në Komisionin parlamentar për Legjislacion, përpara se të kalojë në seancën plenare.
Ndryshimet ligjore ishin në qendër edhe të takimit të së shtunës mes kryeministrit Albin Kurti dhe kryetarit të PDK-së, Bedri Hamza. Pas takimit, Hamza kërkoi që projektligji të miratohej fillimisht në dy lexime, për t’i hapur më pas rrugë diskutimeve për zgjedhjen e presidentit. Ai deklaroi se PDK-ja ishte e gatshme të jepte mbështetjen e saj në këtë proces.
Paralelisht, Kuvendi përballet me afatin për zgjedhjen e kreut të ri të shtetit. Deputetët kanë kohë deri nesër, më 6 tetor, për të zgjedhur presidentin e ri të Kosovës. Nëse procesi dështon, vendi rrezikon të shkojë në zgjedhje të jashtëzakonshme.
Seanca e sotme zhvillohet kështu në një moment vendimtar, kur diskutimet për ndryshimet në ligjin për Specialen ndërthuren me përpjekjet për zhbllokimin e zgjedhjes së presidentit.
