Mjekët në SHBA po paralajmërojnë familjet për rreziqet që mund të sjellin pijet energjike për fëmijët dhe adoleshentët, për shkak të sasive të larta të kafeinës dhe stimuluesve që përmbajnë.
Një koalicion i ri mjekësh e ka rikthyer çështjen në vëmendje pas një marrëveshjeje sponsorizimi mes Monster Energy dhe konferencës sportive universitare Big 12. Mjekët druhen se ekspozimi i markave të pijeve energjike përkrah sportistëve mund t’i bëjë të rinjtë t’i perceptojnë ato si pije sportive.
Sipas Associated Press, një porcion i një pijeje energjike mund të përmbajë rreth 80 deri në 300 mg kafeinë. Për krahasim, një filxhan kafeje prej rreth 240 ml zakonisht përmban afërsisht 80–100 mg.
Akademia Amerikane e Pediatrisë rekomandon që fëmijët dhe adoleshentët të shmangin pijet energjike. Për moshat 12–18 vjeç rekomandohet që marrja ditore e kafeinës të mos kalojë 100 mg, ndërsa fëmijët më të vegjël këshillohen ta shmangin atë.
Konsumi i tepërt i kafeinës mund të shoqërohet me rrahje jonormale ose të shpejta të zemrës, tension të lartë, shqetësime të gjumit, dehidratim, agjitacion dhe në raste të rënda edhe kriza epileptike. Fëmijët me probleme të mëparshme shëndetësore mund të jenë veçanërisht të rrezikuar.
Shifrat tregojnë se përdorimi është megjithatë i përhapur. Sipas sondazhit amerikan Monitoring the Future, 23% e nxënësve të klasës së 12-të, 20% e atyre të klasës së 10-të dhe 18% e nxënësve të klasës së 8-të raportuan se konsumonin çdo ditë pije energjike.
AP rikujton edhe rastin e Davis Cripe, një 16-vjeçar nga Karolina e Jugut që vdiq në vitin 2017 pasi kishte konsumuar disa pije me kafeinë brenda një periudhe të shkurtër. Autoritetet thanë në atë kohë se adoleshenti, i cili nuk kishte një sëmundje të njohur të zemrës, pësoi aritmi.
Industria e pijeve argumenton se produktet mbajnë paralajmërime në etiketa dhe se kompanitë anëtare të shoqatës së industrisë nuk i tregtojnë pijet energjike në shkollat K-12. Monster, nga ana tjetër, tha se pijet energjike konsumohen prej dekadash në mbarë botën.
Mjekët këmbëngulin te një dallim thelbësor: pijet energjike nuk janë pije sportive. Pijet sportive janë krijuar kryesisht për të zëvendësuar ujin dhe elektrolitet e humbura gjatë aktivitetit fizik, ndërsa pijet energjike përmbajnë stimulues si kafeina.
