Për të dytën herë, Prokuroria e Tiranës shtyn edhe me 3 muaj afatin e hetimeve për dy të arrestuarit, Elvis dhe Gjon Shkëmbi, të cilët akuzohen për vrasjen, në bashkëpunim, të gjyqtarit të Apelit të Juridiksionit të Përgjithshëm, Astrit Kalaja, më 6 tetor 2025.
Prokurorët arsyetojnë se, përpara se të vendosin për përfundimin e hetimeve për xhaxha e nip, duhet të administrojnë dhe analizojnë aktin e ekspertimit të celularit të Elvis Shkëmbit, i cili, sipas pamjeve të kamerave të sigurisë së gjykatës, rezulton të jetë personi që tërhoqi këmbëzën ndaj gjyqtarit, fill pasi Astrit Kalaja shpalli një vendim kundër tyre.
Prokurorët kanë dyshime se Gjon Shkëmbi është bashkëpunëtor në vrasje, pasi dyshohet se e ka nxitur nipin për të kryer krimin. Për këtë shkak, të dhënat e celularit të Elvis Shkëmbit konsiderohen me rëndësi për të hedhur dritë mbi krimin.
Burimet thonë se prokurorët kanë administruar aktin e ekspertimit të Gjon Shkëmbit, por ai do të analizohet në harmoni me të dhënat e tjera. Hetimet, sipas urdhrit të prokurorit, duhet të përfundojnë më 8 tetor 2026.
Kalaja u qëllua për vdekje brenda sallës së gjyqit, sapo shpalli një vendim kundër familjes Shkëmbi. Ngjarja tronditi sistemin e drejtësisë dhe ngriti çështjen e sigurisë në gjykata.
Ndërsa, lidhur me gjyqtarin e ndjerë, Shoqata e Gjyqtarëve u bën thirrje institucioneve që të përmbyllin sa më shpejt procedurat për njohjen zyrtare të statusit “Dëshmor i Atdheut” për Astrit Kalanë, duke deklaruar se: “Ky është trajtimi i denjë dhe ligjor për çdo shtetas që vritet në krye të detyrës.”
