Detaje të reja janë mësuar nga atentati me armë zjarri në Sarandë, ku mbeti i plagosur rëndë Thimjo Rubati, i njohur edhe si Sandër Rubati.
Burime bëjnë me dije se Rubati ka pak vite që ka dalë nga burgu, pasi ka qenë i arrestuar në Greqi për një ngjarje të rëndë.
Mësohet se 50-vjeçari ka marrë tre plumba, duke u goditur në disa pjesë të trupit, kofshë, bark, gjoks dhe krahun e djathtë.
Rubati po transportohet me ambulancë në Tiranë.
Policia vijon hetimet për zbardhjen e rrethanave të atentatit, identifikimin e autorëve dhe përcaktimin e motivit të sulmit. Ngjarja dyshohet se është një atentat i organizuar, pasi autorët dyshohet se kanë vepruar të maskuar dhe kanë lëvizur me motor.
Sarandë / Informacion paraprak
Rreth orës 21:15, në lagjen nr. 4, në Sarandë, në rrethana ende të paqarta, është plagosur me armë zjarri para biznesit të tij, shtetasi Th. R., 50 vjeç. Ai është transportuar në spital, ku po merr ndihmë mjekësore.
Shërbimet e Policisë kanë mbërritur menjëherë në vendngjarje dhe vijojnë kontrollet intensive në zonë për identifikimin dhe kapjen e autorit/ve. Nga të dhënat e para dyshohet se autorët kanë qenë dy persona me skafandra, të cilët janë larguar nga vendngjarja me motomjet.
Ndërkohë, grupi hetimor, nën drejtimin e Prokurorisë, po vijon veprimet në vendngjarje për zbardhjen e plotë të rrethanave të ngjarjes, si dhe për identifikimin dhe kapjen e autorit/ve.
