Pas dorëheqjes së Genti Shalës, çështja e ish-ministrit të Brendshëm, Saimir Tahiri, në Gjykatën e Lartë i është caktuar gjyqtarit Enton Dhimitri. Megjithatë, pavarësisht se dosja pret prej vitesh radhën për shqyrtim, ende nuk është caktuar një datë për seancën dhe, për rrjedhojë, nuk janë bërë të ditur as dy anëtarët e Kolegjit Penal që do ta shqyrtojnë atë.
Ish-ministri i Brendshëm u dënua me pesë vite burg për shpërdorim detyre, dënim që u reduktua në 3.4 vite për shkak të përfitimit nga gjykimi i shkurtuar.
Ish-Prokuroria për Krime të Rënda e hetoi Tahirin dhe ngriti ndaj tij akuzat për trafik droge dhe pjesëmarrje në grup të strukturuar kriminal, por për këto akuza ai u shpall i pafajshëm.
Sipas prokurorisë, Tahiri kishte favorizuar grupin kriminal Habilaj në trafikun e lëndëve narkotike nga Shqipëria drejt Italisë. Ish-deputeti vuajti një pjesë të dënimit në burgun e Fierit, ndërsa në vitin 2020 u lirua me vendim të Gjykatës së Elbasanit, e cila pranoi kërkesën e tij për zëvendësimin e dënimit me burg me masën alternative "qëndrim në shtëpi", për shkak të gjendjes shëndetësore të tij dhe të bashkëshortes.
