Influencuesja dhe stilistja e njohur spanjolle Rocío Osorno ka përjetuar momente paniku pasi dy persona të maskuar hynë në banesën e saj në zonën Aljarafe, pranë Seviljes, ndërsa ajo dhe familjarët ndodheshin brenda.
Ngjarja ndodhi teksa Osorno ishte në katin e sipërm duke regjistruar materiale për rrjetet sociale. Ajo dyshoi se diçka nuk shkonte pasi vuri re të hapur një dritare që, sipas saj, zakonisht qëndron e mbyllur. Pasi kuptoi se në banesë kishte persona të panjohur, ajo nisi të bërtiste dhe të paralajmëronte familjarët.
Kamerat e sigurisë kanë regjistruar dy persona të maskuar, me elektrikë të vendosur në kokë, teksa kontrollojnë sirtarët dhe raftet e garderobës në kërkim të sendeve me vlerë. Në regjistrim, personat dëgjohen duke komunikuar në gjuhën shqipe, ndërsa në një moment vendosin të largohen pasi kuptojnë se janë zbuluar.
Në banesë ndodheshin edhe dy fëmijët e Osornos, si dhe ish-bashkëshorti i saj, Jacobo “Coco” Robatto. Familja telefonoi menjëherë numrin e emergjencës 112. Patrullat e Gardës Civile mbërritën brenda pak minutash, por autorët ishin larguar përpara mbërritjes së tyre.
Osorno publikoi më pas pamjet e kamerave të sigurisë në rrjetet sociale dhe deklaroi se ishte ende e tronditur nga ngjarja. Ajo tha gjithashtu se, sipas informacionit që kishte marrë, në zonë ishin regjistruar edhe raste të tjera grabitjesh.
