Të dërguarit e presidentit amerikan Donald Trump, Steve Witkoff dhe Jared Kushner, zhvilluan bisedime me presidentin ukrainas Volodymyr Zelensky në Kiev, në kuadër të përpjekjeve të administratës amerikane për t’i dhënë fund luftës mes Rusisë dhe Ukrainës.
Pas takimit, Kushner deklaroi se delegacioni amerikan pret përparim të mëtejshëm në bisedimet e paqes, ndërsa Witkoff u shpreh se pala amerikane ishte “shumë e inkurajuar” nga diskutimet, të cilat i cilësoi si të rëndësishme.
Vizita në Kiev erdhi pas qëndrimit të dy të dërguarve amerikanë në Moskë, ku zhvilluan rreth tre orë bisedime me presidentin rus Vladimir Putin. Megjithatë, nga ky takim nuk u raportua ndonjë përparim domethënës drejt një marrëveshjeje paqeje.
Zelensky, i cili i priti përfaqësuesit amerikanë në Katedralen e Shën Sofisë në qendër të Kievit, deklaroi para takimit se Ukraina është e gatshme të punojë për afrimin e fundit të luftës.
Ndërkohë, Trump ka lënë të kuptohet se SHBA-të kanë një propozim të ri për procesin e paqes, pa bërë publike detaje. Sipas një zyrtari të Shtëpisë së Bardhë të cituar nga Reuters, hapat e ardhshëm pritet të bëhen të ditur gjatë javëve në vijim.
