Kryetari i Bashkisë së Shkodrës, Benet Beci, u bë mbrëmë, pa dashjen e tij, kryefjalë e medias. Shkak ishin lajmet e publikuara për dorëheqjen e tij nga posti i kryetarit të bashkisë, të cilat ai i përgënjeshtroi duke përdorur edhe ironi për mediat që i kishin publikuar.
Megjithatë, zoti Beci nuk përmendi në reagimin e tij akuzën e ngritur nga Prokuroria e Posaçme, e cila lidhet me kohën kur ai ka drejtuar FSHZH apo KESH. Dy ditë më parë, kryetari i Bashkisë së Shkodrës u shfaq në dyert e SPAK pa dhënë sqarime mbi çështjen për të cilën ishte pyetur nga prokurorët. VNA raportoi mbrëmë se SPAK vendosi zyrtarisht nën hetim Benet Beci, kryebashkiakun e Shkodrës, dhe se atij i është komunikuar akuza përmes avokatit të tij, Ervin Metalla. Ai dyshohet për veprën penale të korrupsionit gjatë pozicioneve të mëparshme.
Benet Beci konsiderohej një “yll” në ngjitje në Partinë Socialiste, pasi, pas marrjes së drejtimit të Bashkisë së Shkodrës, ai u emërua edhe drejtues politik i qarkut. Në Shkodër pritet të kandidojë vetë Edi Rama, dhe pyetja që shtrohet tani, që Beci është nën hetim dhe me gjasë së shpejti i pandehur, është nëse kryeministri do të pranojë që përkrah tij në fushatë të jetë një person me probleme me drejtësinë.
Ironia e zotit Beci, nëse jo e nxituar, ishte të paktën e sforcuar, për aq kohë sa as ai vetë nuk e di se si do të përfundojnë hetimet për të. Ndërkohë, ajo që dihet me siguri është se Edi Rama nuk i “amniston” për gjatë ata që hyjnë e dalin nga dera e SPAK-ut.
