Sali Berisha nuk ka përjashtuar mundësinë e një aleance me Arlind Qorin. I pyetur sot nga gazetarët për një bashkëpunim të mundshëm me lëvizjen “Bashkë” të drejtuar nga Qori, kryetari i PD-së tha: “Cilido politikan që ndjehet i përkushtuar kundër narko-shtetit të Edi Ramës është i mirëpritur në betejën tonë të përbashkët për të përmbysur këtë regjim, për të krijuar një qeveri teknike për zgjedhje të lira dhe të ndershme. Unë personalisht, të gjitha veprimet, cilido t’i organizojë, i kam përshëndetur dhe do t’i përshëndes. I vetmi kusht është t’i shoqërojë fjalët me vepra, të bashkohemi për një qëllim madhor, të shpëtojmë Shqipërinë nga ky regjim që, në një mënyrë apo tjetër, po shfaros farën e shqiptarëve dhe po e zbraz Shqipërinë.”
Partitë dhe lëvizjet e reja opozitare deri më tani kanë mbajtur distancë nga PD-ja dhe Sali Berisha, duke mos pranuar një aleancë me të. Muajt në vazhdim pritet të jenë vendimtarë për të parë se si do të grupohen forcat opozitare përballë PS-së së Edi Ramës.
