Kryeministri Edi Rama ka zhvilluar takimin e tij të dytë me emigrantët shqiptarë në Greqi, këtë herë në qytetin e Selanikut, pas takimit të parë që pati në Athinë disa muaj më parë.
Gjatë fjalës së tij, Rama foli edhe për protestën kundër vizitës së tij, të cilët ai i quajti “fantazma të gjalla të së shkuarës.” Protestuesit përdorën fletushka dhe parulla që lidhen me çështjen e “Vorio Epirit,” çka e shtyu kryeministrin të shprehë keqardhjen e tij për këto veprime, duke theksuar se ato nuk kontribuojnë në përmirësimin e marrëdhënieve mes Shqipërisë dhe Greqisë.
“Vorio Epiri është një term i vdekur,” deklaroi Rama. “Këto nuk janë arsye që të ushqejmë ndjenja jo miqësore ndaj Greqisë. Greqia është një partner i pazëvendësueshëm që, bashkë me Italinë dhe Turqinë, përbën një trekëndësh strategjik të politikës sonë të jashtme.”
