Kryetari i Lëvizjes BASHKË, Arlind Qori, ka reaguar sot në rrjetet sociale duke i kërkuar kryeministrit Edi Rama t’i përmendë emrin kur flet dhe e akuzon.
“Dy herë është detyruar Edi Rama të më përmendë publikisht. Në të dyja rastet pa edukatën e të drejtuarit në emër, por i fiksuar në mënyrë perverse me aftësinë time për të shikuar. Gjatë protestave studentore të dhjetorit 2018 më drejtohej ‘Është një qorr…’, duke zgjuar indinjatën e një studenti të verbër që kishte përballë. Kurse sot më ka quajtur ‘Sude me gjyslyke’. I digjte atëherë përfshirja ime mes studentëve, i përcëllon sot ndikimi im dhe i Lëvizjes BASHKË te pensionistët.
I gjori! Kujton se do të zgjidhet prapë kryeministër,” – shkruan Arlind Qori në Facebook, pasi së fundmi drejtoi edhe një protestë të pensionistëve përpara Kryeministrisë. Kreu i Lëvizjes BASHKË së fundmi është përfshirë në polemika edhe me drejtues të partive të tjera të vogla opozitare, duke zbehur shpresën se fluksi i votës opozitare do të orientohet i gjithi bashkë kundër votave që pritet të marrë PS e drejtuar nga Edi Rama në zgjedhjet e vitit të ardhshëm.
