Këshilli i Legjislacionit në Kuvend ka pranuar vendimin e Gjykatës Kushtetuese lidhur me rregulloren për dënimet e deputetëve. Vendimi u miratua vetëm me votat e pesë deputetëve socialistë, pasi deputetët e opozitës zgjodhën të mos marrin pjesë në votim.
Deputeti socialist Toni Gogu deklaroi se “Ne i zbatojmë katërcipërisht vendimet e Gjykatës Kushtetuese. Por duhet të ketë balancë mes disiplinës dhe lirisë së shprehjes”.
Ndërkohë, diskutimi për dy pika të tjera u shty për shkak të mungesës së relatorëve. Këto pika përfshijnë ndryshimet për komisionet hetimore, ku relator ishte Ermonela Felaj, dhe për profesionet e lira, ku relator është Eduart Shalsi.
Vendimi i sotëm ruan në fuqi përjashtimet 60-ditore për deputetët e Partisë Demokratike për incidente të mëparshme që përfshinin zjarrvënie dhe dëmtime të tjera në Kuvend. Ndërkohë, për akuzën e dhunës ndaj Gardës, masa e përjashtimit prej 30 deri në 60 ditë është hequr.
