Ndërsa në shumicën e vendeve burgjet e sigurisë së lartë funksionojnë si institucione me kontrolle të rrepta dhe rregulla të pandryshueshme, në Shqipëri ato po kthehen “klinika estetike”, apo vende ku zhvillohen “takime speciale” me persona të njohur të ekranit dhe botës së shoëbiz-it.
Në pamje të parë kjo mund të tingëllojë si një shaka, por informacionet që vijnë nga brenda sistemit penitenciar shqiptar, flasin qartë për një realitet alarmant.
Prej ditësh, në media janë publikuar lajme tronditëse për vizita të shpeshta të moderatoreve, modeleve dhe vajzave të njohura të ekranit në burgje, ku zhvillohen “takime speciale” me të dënuar për krime të rënda.
Skandali shpërtheu fillimisht në burgun e Drenovës, ku sipas raportimeve, i dënuari me burgim të përjetshëm, Laert Haxhiu, ka zhvilluar një takim të tillë me një modele të njohur kosovare me inicialet Z.Z. Madje, në javë të ndryshme janë regjistruar hyrjet e dy vajzave të tjera të njohura të shoëbiz-it shqiptar, me inicialet A.D. dhe R.R., të cilat kanë realizuar takime të ngjashme në dhoma të posaçme.
Të njëjtat fenomene janë konstatuar edhe në burgun e Reçit, ku një anëtar i grupit “Bajri” dyshohet se ka pasur takime me persona të jashtëm nën të njëjtat kushte. Por kjo nuk ndalet vetëm në këto institucione. Burime konfidenciale tregojnë se praktika të tilla janë bërë të zakonshme edhe në burgjet e Korçës, Burrelit, Peqinit, si dhe në paraburgimin 313 në Tiranë. Vajza të shoëbiz-it, eskorta nga Kosova, madje edhe nga vende si Venezuela dhe Bolivia, kanë hyrë për "vizita të veçanta" tek të dënuar përjetësisht.
Për hyrjen e dy vajzave eskortë në burgun e Drenovës kanë qenë në dijeni të plotë shefi i policisë së burgut, Dylber Beqiri, dhe drejtori i këtij institucioni, Leonard Mardoda. Në burgun e Reçit, prezenca e vajzave është regjistruar në librat zyrtarë të hyrje-daljeve, ndërsa kamerat e sigurisë kanë fiksuar pamje të qarta të tyre.
Këto “takime speciale” mundësohen përmes manipulimit të regjistrave, ku falsifikohen të dhënat e të dënuarve, ose shënohen identitete të tjera për të fshehur gjurmët.
Përpos këtyre takimeve, jemi dëshmitarë se si burgu shërben edhe për të ndryshuar pamjen e jashtme me ndërhyrje estetike. Rasti është me ish-deputetin e PD, Ervin Salianji. Kur u dënua me një vit burg për kallëzimit të rremë, një pjesë të flokëve nuk i kishte. Por kur doli për herë të parë në media pas dënimit, gjatë votimit në zgjedhjet e 11 majit, pamja e tij e jashtme kishte ndryshuar, pasi kishte mbjell flokët në burg. Gjë që tregonte se burgu nuk qenka një e keqe e madhe që mund t’i ndodh një të dënuari, me një rast shërben edhe për riparime estetike.
Por rasti i Salianjit duket si një detaj i vogël përballë zhvillimeve të fundit.
Edhe pse këto ngjarje kanë dominuar lajmet për ditë me radhë, Drejtoria e Përgjithshme e Burgjeve dhe Ministria e Drejtësisë nuk kanë dalë me asnjë deklaratë zyrtare. Kjo heshtje ngre dyshime të forta për vërtetësinë e këtyre informacioneve. Nëse ka të vërteta në këto raportime, përse ministri Ulsi Manja nuk ndërmerr veprime ndaj drejtuesve të IEVP-ve përkatëse?
Madje edhe momentin e ka në favor, pasi ndodhemi në një kohë kur qidnra drejtorë në të gjithë shqipërinë po japin dorëheqje pasi shefi i tij mendon se nuk kanë bërë punën mirë. Çfarë e kursen Manjën që të verifikojë këto informacione dhe të bëj të njëjtë gjë me drejtorët e tij?
Apo ai hakërret vetëm kur merr urdhër nga kryeministri si në rastin e prokurores në Shkodër, që kërkon ta shpall fajtore deri në ILD.
Edhe nëse kjo është e vërtetë, a është kryeministri në dijeni të këtyre zhvillimeve tronditëse? A e ka parë që disa drejtorë po e shndërrojnë sistemin penitenciar në “bordello me siguri të lartë”?
Në çdo rast qytetarët e kërkojnë një sqarim.
