Ushtrisë së Iranit mund t’i jepet zyrtarisht përgjegjësia për menaxhimin e Ngushtica e Hormuzit, sipas një projektligji të propozuar, bëri të ditur kreu i Komitetit të Sigurisë Kombëtare, Ebrahim Aziz, në televizionin shtetëror.
Aziz deklaroi se forcat e armatosura iraniane tashmë kontrollojnë këtë kalim strategjik dhe synojnë të ndalojnë kalimin e “anijeve armiqësore”. Sipas tij, kuadri i ri ligjor do të mundësonte edhe vendosjen e tarifave në rialë iranianë për anijet që kalojnë nëpër ngushticë.
Ngushtica e Hormuzit mbetet kryesisht e mbyllur për transportin ndërkombëtar detar, pasi një kombinim i bllokadave nga Irani dhe Shtetet e Bashkuara ka sjellë një nga korridoret më të rëndësishme të energjisë në botë në një ndalesë pothuajse të plotë. Në ditët e fundit është regjistruar trafik shumë i kufizuar anijesh, kryesisht në koordinim me Teheranin. Raportimet tregojnë se anije të shpejta iraniane kanë hapur zjarr ndaj disa mjeteve lundruese, ndërsa forcat amerikane kanë sekuestruar dy cisterna.
Sipas të dhënave të Bloomberg, vetëm disa anije me lidhje me Iranin kanë arritur të dalin nga Gjiri Persik, ndërsa nuk është regjistruar trafik hyrës, duke theksuar bllokimin e thellë të qarkullimit detar.
Lufta në Lindjen e Mesme, tashmë në javën e nëntë, ka goditur rëndë rrjedhën e naftës dhe karburantit në tregjet ndërkombëtare. Çmimet e naftës kanë kaluar mbi 100 dollarë për fuçi, ndërsa përpjekjet për rifillimin e negociatave të paqes mbeten të bllokuara.
Anijet me sisteme aktive identifikimi janë kufizuar në një korridor të ngushtë pranë ishujve Larak dhe Qeshm, duke ndjekur rrugë të miratuara nga autoritetet iraniane. Ndërkohë, disa mjete lundruese dyshohet se po fikin sinjalet e tyre të vendndodhjes për të shmangur kontrollin, çka e bën edhe më të paqartë panoramën reale të transportit detar në zonë.
Situata mbetet e tensionuar, ndërsa çdo zhvillim në këtë pikë kyçe të tregtisë globale pritet të ketë ndikim të drejtpërdrejtë në ekonominë botërore.
