Ministri i Mbrojtjes i Malit, Gjenerali Sadio Camara, ka humbur jetën gjatë një serie sulmesh të koordinuara ndaj objekteve ushtarake në të gjithë vendin.
Lajmi u raportua të dielën, pas një sulmi të shpejtë ndaj rezidencës së tij në qytetin ushtarak të Kati-t, i cili ndodhi më 24 orë pas sulmeve të tjera të një grupi lidhur me al-Kaedën dhe kryengritësve Tuareg. Camara ishte një figurë kyçe në qeverinë ushtarake që mori pushtetin pas dy grushteve të shtetit në 2020 dhe 2021 dhe konsiderohej nga shumë si një udhëheqës i mundshëm i ardhshëm i Malit.
Sulmi ndaj rezidencës së tij në Kati, një qytet që është ndër më të fortifikuarit në vend, u realizua përmes një makine-bombë nga grupet e lidhura me “Jama’at Nusrat al-Islam wal-Muslimin” (JNIM), së bashku me luftëtarët e Frontit të Çlirimit të Azawad (FLA), rebelëve Tuareg. Ky koordinim i sulmeve të grupeve të ndryshme, të cilat më parë kishin luftuar kundër njëra-tjetrës, tregon një bashkëpunim të ri mes këtyre grupeve, të cilat kanë vendosur të bashkohen për të luftuar kundër shtetit të Malit.
Sulmet kanë shpërthyer edhe në qytetet e tjera të Malit, përfshirë Bamakon, Gaon, Kidalin dhe Sevaren, duke vazhduar edhe pas më shumë se 24 orësh nga fillimi i konfliktit. Gjatë sulmeve, shumë shpërthime dhe zhurma të armëve të zjarrit janë dëgjuar në qytetin e Kidalit, që ka shkaktuar shqetësime për zhvillime të mëtejshme të luftimeve.
Në anën tjetër, Presidenti i përkohshëm i Malit, Assimi Goita, është transferuar në një lokacion të sigurt pas sulmit, dhe është konfirmuar që ai është mirë.
Pas vdekjes së Camara-s, shumë analistë dhe ekspertë të sigurisë shprehen se këto sulme do të përshkallëzohen dhe luftërat për kontrollin e territorit do të vazhdojnë, duke theksuar se grupet që luftonin më parë kundër njëra-tjetrës tani kanë arritur marrëveshje për të punuar së bashku.
Komuniteti ndërkombëtar, përfshirë Bashkimin Afrikan dhe Shtetet e Bashkuara, kanë dënuar këto sulme dhe kanë shprehur shqetësim për pasojat që mund të sjellin për sigurinë dhe stabilitetin e vendit.
