Kreu i Partisë Demokratike, Sali Berisha, duket se kërkon ta shndërrojë vizitën e tij në Shtetet e Bashkuara jo vetëm në një fitore personale politike, por edhe në një arsye për rikthimin në parti të demokratëve që janë larguar gjatë viteve të fundit.
Në mbledhjen e grupit parlamentar të PD-së, Berisha u bëri thirrje demokratëve të distancuar nga partia që të rikthehen, duke e lidhur apelin pikërisht me udhëtimin e tij të fundit në SHBA. Sipas tij, një pjesë e tyre kishin konsideruar ndalimin e vizës amerikane si pengesë për t’u bashkuar me Partinë Demokratike.
“Ky udhëtim imi duhet dhe shpresoj të shërbejë edhe si një apel bashkimi për të gjithë ata demokratë dhe demokrate që deri më sot kanë konsideruar ndalimin e vizës për Sali Berishën si një pengesë për t’u bashkuar me ne”, deklaroi Berisha.
Por dera nuk është e hapur për të gjithë.
Kryedemokrati përjashtoi nga ftesa ata që ai i konsideron të lidhur me mazhorancën, duke i quajtur “aksionerë të qeverisë”. Ftesën e adresoi tek ata demokratë që, sipas tij, janë distancuar për shkak të mendimeve apo mosmarrëveshjeve me drejtimin e partisë.
Megjithatë, kjo duket një tentativë tjetër e dëshpëruar e kryedemokratit për të afruar të larguarit, pasi problemi i PD vështirë se mund të reduktohet vetëm tek një vizë amerikane. Udhëtimi i Berishës në SHBA është një zhvillim politik me peshë për të, por nuk do të thotë automatikisht se janë zhdukur të gjitha arsyet që kanë larguar ndër vite figura, votues apo mbështetës nga Partia Demokratike.
Madje, edhe historia e “non gratës” është më e ndërlikuar sesa formula “shkova në Amerikë, ndaj pengesa ra”. Departamenti amerikan i Shtetit ka konfirmuar dhënien e përjashtimeve, për disa persona “non grata”. Ndërkohë, fakt është që emri i Sali Berishës vazhdon të jetë në listimin publik të vitit 2021 të Departamentit të Shtetit.
Por përtej Amerikës, PD ka një sfidë shumë më pranë shtëpisë, të bindë demokratët dhe shqiptarët.
Sepse një parti politike nuk bashkohet vetëm me një vulë në pasaportë dhe as rinovohet nga një biletë avioni përtej Atlantikut. Ajo duhet të ofrojë ide, alternativë politike, hapje dhe hapësirë për figura të reja. Rikthimi i njerëzve që janë larguar kërkon përgjigje edhe për arsyet pse u larguan, jo vetëm njoftimin se kryetari tashmë mund të udhëtojë në SHBA.
Pra, bileta për në Amerikë u sigurua. Tani mbetet bileta më e vështirë, ajo për të bindur demokratët dhe qytetarët shqiptarë që PD dhe Sali Berisha janë alternativë.
