Sali Berisha është rikthyer sërish te zgjedhjet e 11 majit të vitit të kaluar, duke përshëndetur punën e komisioneve të reformës zgjedhore dhe territoriale dhe duke deklaruar se procesi u “damkos” ndërkombëtarisht si zgjedhje në kushtet e “partisë shtet”.
Në deklaratën e tij, Berisha foli për “farsë elektorale”, për raportet e OSBE/ODIHR-it, Parlamentit Europian dhe Këshillit të Europës, ndërsa tha se opozita është e gatshme të zbatojë “një për një” rekomandimet ndërkombëtare për reformën zgjedhore.
“Partia shtet nuk zhvillon zgjedhje, por farsë elektorale”, deklaroi ai.
Por ndërsa lideri demokrat rikthehet sërish te zgjedhjet e vitit të kaluar dhe te nevoja për reforma të reja, Partia Demokratike ende nuk ka zhvilluar një analizë të plotë dhe reale të humbjes së vet politike.
Nuk ka ende një bilanc publik për strategjinë, gabimet, përgjegjësitë apo mënyrën se si opozita humbi përballë mazhorancës. Në vend të një reflektimi të brendshëm politik, narrativa vazhdon të mbetet pothuajse tërësisht te “partia shtet” dhe “farsa elektorale”.
