Ish-kryeministri Sali Berisha, u paraqit në SPAK këtë të hënë në zbatim të masës së sigurisë “detyrim për paraqitje”. Teksa fliste para godinës prej xhami, Berisha doli kundër ndryshimeve të Kodit të Procedurës Penale, të prezantuara pak ditë më parë nga kryeministri Edi Rama.
Sipas Berishës ndryshimet në Kod e rikthejnë vendin në kohën e diktaturës.
“Diktaturë e vërtetë, e hapur. Vetëm në diktaturë, vetëm dosjet e Sigurimit të Shtetit, dhe jo të gjykatave, sepse gjyqet i bënin publike kundër armiqve, por dosjet e Sigurimit të Shtetit ishin top sekret dhe po të botoje një gjë prej tyre, përgjigjja. Ka marrë krejtësisht modelin e vjetër. Ka marrë modelin e diktaturës, është vendosje e diktature dhe unë ftoj gazetarët të mblidhen me urgjencë dhe të reagojnë ndaj këtyre ligjeve, të cilat, e vërteta është, vendosin censurë të rrezikshme ndaj tyre. Vendosin censurë të rrezikshme ndaj tyre!”, tha ai.
Berisha mohoi ndërkohë të jetë takuar me Edi Ramën në ambjentet e Aeroportit të Rinasit.
“Unë po shkoja në Strasburg, ku pata takime të shkëlqyera. Ai u kthye nga Amerika ku u takua me Taulant Ballën. A mund të imagjinojë kush të takoj një njeri që nuk e takon njeri. Kurrën e kurrës. As nuk denjoj t’ia hedh shikimin”, deklaroi kreu i PD-së.
