Presidenti i Republikës, Bajram Begaj, ka zgjedhur të mos i drejtohet fizikisht sallës së seancave plenare për hapjen e sesionit të ri parlamentar. Në vend të pranisë në sallë, kreu i shtetit u ka përcjellë deputetëve një mesazh me shkrim përpara nisjes së punimeve.
Në mesazhin e tij drejtuar ligjvënësve, Presidenti Begaj apelon për bashkëpunim dhe mirëkuptim mes palëve politike.
Qëndrimet dhe mesazhet kryesore të Presidentit Begaj:
Për përgjegjësinë dhe bashkëpunimin:
"Mandatet dhe bindjet politike janë të ndryshme, por përgjegjësia ndaj Shqipërisë është e përbashkët."
Për demokracinë dhe rolin e Kuvendit:
"Një demokraci e konsoliduar nuk përcaktohet nga mungesa e dallimeve. Përkundrazi, ajo dallohet nga mënyra se si i përballon ato. Dallimet politike bashkëjetojnë me demokracinë dhe Kuvendi është vendi ku ato duhet të shprehen, të debatohen dhe të përballen me argumente."
Për reformën në drejtësi dhe SPAK-un:
"Në këtë rrugëtim, konsolidimi i reformës në drejtësi mbetet një nga përgjegjësitë më të rëndësishme të shtetit shqiptar. Rezultatet e SPAK-ut janë një nga arritjet e saj më të rëndësishme. Reforma duhet të arrijë një drejtësi eficiente, me standarde evropiane dhe që ndihet në jetën e qytetarit."
Për protestat dhe zërin qytetar:
"Protesta paqësore dhe shprehja e lirë e mendimeve janë pjesë e natyrshme e jetës demokratike. Është inkurajuese kur zëri i qytetarëve gjen hapësirë në debatin publik dhe merr vëmendjen e institucioneve."
Hija e errët e episodit të 15 janarit 2024
Zgjedhja e Presidentit Begaj për të dërguar letër është në kushtet e natyrshmërisë se si kanë vepruar të gjithë presidentët në nisje të sesioneve parlamentare. Por vetë Begaj ka shënuar një rast kur tentoi që të flasë nga foltorja vjen pas precedentit të vitit 2024.
Më 15 janar 2024, gjatë nisjes së sesionit parlamentar, Presidenti Bajram Begaj mori pjesë personalisht në seancë për t'i drejtuar një fjalë përshëndetëse Kuvendit. Megjithatë, ajo seancë u përfshi nga tensione të forta, pasi deputetët e opozitës (Partia Demokratike) bllokuan foltoren dhe përdorën bilbila, duke pamundësuar mbajtjen e fjalës nga kreu i shtetit.
Në atë kohë, kreu i Grupit Parlamentar të PD-së, Gazment Bardhi, e konsideroi praninë e Begajt si një "provokim të ulët ndaj opozitës", duke e akuzuar Presidentin se po përdorej nga kryeministri Edi Rama dhe mazhoranca e PS-së për të mbuluar krizën parlamentare dhe aksionin e atëhershëm opozitar. Si pasojë e bllokimit, Presidenti u detyrua të largohej nga salla dhe ta publikonte mesazhin e tij nga faqja zyrtare e Presidencës.
