Ukraina ka rënë dakord për kushtet me Shtetet e Bashkuara për marrëveshjen për mineralet e rralla, bën me dije një burim i qeverisë ukrainase për BBC.
Nga pala amerikane ende nuk ka një konfirmim.
Marrëveshja, pasi të nënshkruhet, mund të zhbllokojë një partneritet të ri afatgjatë midis Kievit dhe Shtëpisë së Bardhë të Donald Trump, pas javësh shkëmbimesh gjithnjë e më të tensionuara.
Po sipas të njëjtit burim, Volodymyr Zelensky planifikon të udhëtojë në Uashington të premten për të takuar Donald Trump. Data e takimit ‘kokë më kokë’ është propozuar nga pala amerikane.
Pse SHBA dëshiron akses në mineralet e Ukrainës
Mineralet kritike “janë themeli i ekonomisë së shekullit të 21”, sipas shkencëtarit politik Dr Robert Muggah.
Mineralet luajnë rol kyç për energjinë e rinovueshme dhe infrastrukturën industriale, thotë ai, si dhe luajnë “një rol strategjik në rritje në gjeopolitikë dhe gjeo-ekonomi”.
Gjithashtu SHBA-ja është e prirur të zvogëlojë varësinë e saj nga Kina, e cila aktualisht kontrollon rreth 75% të depozitave të tokës së rrallë në botë, sipas Grupit të Investimeve Gjeologjike.
Kina gjithashtu ka kufizuar më parë eksportet e saj të mineraleve në SHBA, përpara se të ndalonte eksportin e disa mineraleve në dhjetor.
