Arrestohen në Durrës dy të shumëkërkuar nga Maqedonia e Veriut. Senafi Nuredini, 34 vjeç, dhe M. Xh., 26 vjeç, të cilët konsiderohen me rrezikshmëri të lartë shoqërore, u arrestuan në kuadër të një operacioni ndërmjet strukturave të Policisë së Shtetit dhe partnerëve të Shërbimit Diplomatik të Sigurisë (DSS) në ambasadat e Shteteve të Bashkuara të Amerikës në Tiranë dhe në Shkup.
Dy të shumëkërkuarit akuzohen nga autoritetet e Republikës së Maqedonisë së Veriut për vrasje, plagosje, armëmbajtje pa leje, si dhe pjesëmarrje në organizatë kriminale.
“Në momentin e ndalimit, atyre iu gjetën dokumente identifikimi të dyshuara të falsifikuara, të cilat dyshohet se i kanë përdorur për të dalë nga territori i Republikës së Maqedonisë së Veriut”, njoftoi policia.
Në pranga përfundoi edhe Xhenkiz Rushiti, nga RMV-ja, i cili dyshohet se u ka siguruar të kërkuarve dokumentet false.
Ndaj Rushitit, 26 vjeç, u ngritën akuzat “Përkrahja e autorit të krimit” dhe “Falsifikimi i dokumenteve”. Gjatë kontrolleve në banesën e tij, shërbimet e Policisë gjetën dhe sekuestruan, me cilësinë e provës materiale, një sasi të vogël lënde të dyshuar narkotike Cannabis Sativa.
