Me rastin e Konferencës Ndërqeveritare mes Shqipërisë dhe Bashkimit Evropian që u zhvillua sot në Bruksel, ambasadori i Gjermanisë në Tiranë, Karl Bergner, deklaroi se arritja e objektivave të ndërmjetme në grupkapitullin “Fundamentals” përbën një hap të rëndësishëm në procesin e integrimit europian të Shqipërisë.
Në deklaratën e tij, diplomati gjerman përgëzoi qytetarët shqiptarë, si edhe përfaqësuesit e politikës, administratës dhe drejtësisë që kanë kontribuar në këtë proces.
“Shqipëria është pjesë e familjes evropiane. Ndaj Gjermania e mbështet fuqimisht anëtarësimin e saj në Bashkimin Evropian”, u shpreh Bergner.
Ai theksoi se shteti ligjor, mbrojtja e të drejtave themelore dhe demokracia pluraliste mbeten thelbi i vlerave europiane dhe se progresi në kapitullin “Fundamentals” do të përcaktojë ritmin e Shqipërisë drejt BE-së.
Ambasadori gjerman e cilësoi dakordësinë për IBAR si një pikënisje për hapa të tjerë në forcimin e shtetit ligjor dhe konsolidimin e institucioneve përgjegjëse.
Në deklaratën e tij, Bergner vendosi theks të veçantë te drejtësia dhe lufta kundër korrupsionit, duke paralajmëruar se respektimi i pavarësisë së sistemit gjyqësor dhe lufta pa pengesa ndaj korrupsionit, edhe në nivelet e larta, janë kushte “të panegociueshme” për avancimin e Shqipërisë në procesin e anëtarësimit.
“Këtu bën pjesë edhe fakti që vendimmarrjet lidhur me heqjen e imunitetit duhet të jenë në harmoni me rekomandimet e Komisionit të Venecias”, deklaroi ai.
Sipas ambasadorit gjerman, këto pritshmëri janë të përcaktuara qartë nga shtetet anëtare të BE-së në deklaratën e tyre të përbashkët si kushte për përmbylljen e negociatave me Shqipërinë.
Ai shtoi se Gjermania, ashtu si institucionet dhe vendet e tjera anëtare të Bashkimit Evropian, do të ndjekë me shumë vëmendje zhvillimet e ardhshme dhe do të mbështesë vijimin e reformave në Shqipëri.
