Kryetari i bashkisë së Tiranës, Erion Veliaj, prej disa muajsh është kthyer në kryelajmin e mediave për shkak të hetimeve që po kryen SPAK ndaj tij dhe familjarëve të tij. Ditën e sotme ai është paraqitur për herë të dytë në Prokurorinë e Posaçme për t'u pyetur për 5 orë nga prokurorët.
Nëse herën e parë, kur doli nga SPAK, ishte i qeshur dhe nuk nguroi t’i konsideronte hetuesit kolegë, sot ishte pak më i zbehur dhe nuk dha asnjë shpjegim për mediat, duke u larguar mes thirrjeve “hajdut” të protestuesve që e prisnin jashtë institucionit.
Reagimin e bëri disa orë më vonë në mbledhjen e këshillit bashkiak, ku, edhe kësaj radhe, u mundua ta minimizonte paraqitjen në SPAK, me arsyen se ishte denoncuar nga një person anonim dhe që, sipas tij, ky është një kurth.
“Jam denoncuar në mënyrë anonime nga një qytetar që quhet Nesti Angoni, i cili është një personazh që nuk ekziston, për të na kthyer mallin e letrave anonime. Unë e kuptoj që disa njerëz që nuk na mundin dot në zgjedhje janë kthyer në zanatin e letrave anonime. Të gjithë e dimë se çfarë përfaqëson ky emër, çfarë mentaliteti përfaqëson dhe çfarë kulture linçuese përfaqëson ky stil. Duke qenë se kryetari i bashkisë ka në zotërim regjistrin e gjendjes civile dhe mund të verifikojë se është një kurth i sajuar, kam qenë bashkëpunues. Do ishte shqetësuese nëse kryetari i bashkisë edhe për kurthe anonime nuk paraqitet. E di gjithë Tirana ku jetoj unë, e di gjithë Tirana ku banoj unë, ku isha para zgjedhjeve, ku do jem pas zgjedhjeve dhe ku do jem deri në fund të kësaj detyre” – tha Veliaj.
Nuk e dimë se sa e vërtetë është ajo që thotë Veliaj për denoncuesin anonim, por arsyetimi i tij duket paksa qesharak. Fakt është se SPAK ka disa muaj që kryen hetime për pasurinë e tij dhe të familjarëve të tij, dhe ka shkuar deri aty sa BKH i ka bastisur shtëpinë e tij, banesën e të vëllait dhe ka sekuestruar pajisje dhe dokumente të bashkëshortes së kryebashkiakut. Në rastin më të vogël, kjo tregon se hetimi është serioz dhe nuk ka asnjë kurth në këtë mes.
Ndër të tjera, Veliaj thotë se ‘e di gjithë Tirana ku banon ai’. Kjo është e vërtetë, e di gjithë Tirana që jeton në një zonë tepër të shtrenjtë të Tiranës. Madje e dinë që ke bërë një dasmë luksoze me kursimet e pensionit të mamasë.
Qytetarët gjithashtu dine edhe se ke bërë një incenerator, por që nuk po e gjejmë se ku është, dhe se në bashki ke pas punësuar 5 drejtorë që vidhnin lekët e qytetarëve dhe, për ironi të fatit, SPAK sot ka përfunduar hetimet ndaj tyre. Këto të gjitha i dinë qytetarët e Tiranës, për çfarë u duhet denoncuesi anonim nëse ekziston apo jo?!
