Burgu 325 në Ali Demi, në një zonë tashmë shumë të populluar, do të jetë një burg i hapur. Dikur, në këtë burg vuajtën dënimin gratë e dënuara për vepra të ndryshme penale. Prej muajit korrik, qelitë janë boshatisur dhe gratë e dënuara dhe të paraburgosura janë transferuar në burgun e Pojskës në Pogradec.
Në Ali Demi pritet të mbërrijnë "banorët" e parë. Ligji parashikon që në këtë burg do të transferohen vetëm ata të dënuar që iu ka mbetur për të vuajtur një dënim jo më shumë se 2.5 vite. Kontigjenti i parë i të dënuarve do të punësohet menjëherë duke kryer punë brenda qelive, si mirëmbajtje e ambienteve të jashtme, heqje të rrethimit me tela, si dhe lyerje apo rikonstruksione të vogla në qeli.
Burgu është parashikuar të jetë i hapur, sepse të dënuarit do të kenë mundësinë të punojnë gjatë ditës dhe në mbrëmje të kthehen në burg. Sipas draftit paraprak, i dënuari, edhe me ndihmën e institucionit, duhet të lidhë një kontratë me një biznes. Gjatë ditës, ata do të monitorohen nga strukturat përkatëse për të siguruar përmbushjen e detyrimeve. Punësimi ka për qëllim që të dënuarit të sigurojnë të ardhura për veten dhe familjen e tyre.
Të dënuarit që mund të transferohen duhet të bëjnë kërkesë pranë Drejtorisë së Përgjithshme të Burgjeve, e cila kërkon dhe miratimin e gjykatës. Koha se kur Ali Demi do të presë të dënuarit e parë nuk dihet ende, por mbetet për t'u parë nëse do të funksionojë ky projekt pilot që implementohet për herë të parë në Shqipëri, pavarësisht përpjekjeve të mëparshme nga gjykatat për të aplikuar gjysmëlirinë.
