Kryeministri i Greqisë, Kyriakos Mitsotakis, gjatë homazheve në nder të Kryepeshkopit Anastas, vlerësoi kontributin e tij të jashtëzakonshëm si një figurë kyçe e ortodoksisë dhe një urë miqësie mes Shqipërisë dhe Greqisë.
Në fjalën e tij, Mitsotakis tha se mungesa e Kryepeshkopit Anastas do të jetë e pazëvendësueshme dhe se ai ka shërbyer si një simbol i urtësisë, veprimit dhe sakrificës.
“Ka qenë një themelues madhor dhe pionier i ortodoksisë në Shqipëri. Para një personaliteti të tillë ne përulemi. Ishte një intelektual i besimit dhe një shërbëtor i thjeshtë i njeriut. Largimi i tij lë pas një boshllëk të pazëvendësueshëm jo vetëm në Shqipëri dhe diasporën tonë, por kudo ku rreh zemra e helenizmit,” u shpreh kreu i qeverisë greke.
Mitsotakis e cilësoi Kryepeshkopin Anastas si një figurë të ndritur, një dritë dashurie dhe sakrifice, e cila për dekada me radhë ishte një udhërrëfyes për jetën e krishterë.
