Reshjet e dendura të shiut kanë shkaktuar probleme në disa zona të Durrësit, ku përmbytjet kanë prekur rrugë, banesa dhe infrastrukturën energjetike.
Një nga pikat më të prekura është nënstacioni elektrik në Rrashbull, i cili rrezikon të dalë jashtë funksionit për shkak të nivelit të lartë të ujit. Po ashtu, uji ka mbuluar rrugën hyrëse në Sukth dhe disa parcela bujqësore në këtë njësi, duke vështirësuar qarkullimin dhe dëmtuar prodhimin bujqësor.
Më problematike paraqitet situata në Njësinë Administrative Nr. 6, ku uji ka vështirësuar lëvizjen në akset kryesore dhe disa rrugë dytësore. Në këtë zonë, por edhe pranë rrugës së kolaudimit në Shkozet, disa banesa janë përmbytur, duke shkaktuar dëme për banorët.
Megjithatë, në disa zona të Sukthit dhe Katundit të Ri, ku është kryer rehabilitimi i argjinaturave, situata është më e stabilizuar.
Autoritetet lokale dhe emergjencat civile janë në terren për të larguar ujin nga banesat dhe për të ndihmuar banorët e prekur. Po vijon kontrolli i sistemeve kulluese, hidrovorëve dhe argjinaturave të lumenjve Erzen dhe Ishëm për të parandaluar përkeqësimin e situatës.
Në gatishmëri janë të gjitha kapacitetet logjistike dhe burimet njerëzore të forcave operacionale për të përballuar çdo zhvillim të mundshëm. Monitorimi vijon në mënyrë të pandërprerë për të siguruar një reagim sa më të shpejtë dhe efikas ndaj emergjencës së krijuar.
