Pas një ndërprerjeje dy mujore, marrëveshja mes Shqipërisë dhe Italisë për strehimin e emigrantëve është riaktivizuar. Sot në mëngjes, anija “Cassiopea” e marinës ushtarake italiane mbërriti në portin e Shëngjinit, duke sjellë grupin e parë të emigrantëve për këtë vit. Ata do të sistemohen në qendrën e strehimit në Gjadër.
Kjo lëvizje vjen pas vendimit të Gjykatës Europiane të Drejtësisë, që mbështeti kërkesën e kryeministres italiane Giorgia Meloni për zbatimin e modelit të transferimit Italo-shqiptar. Marrëveshja kishte hasur pengesa ligjore muajt e fundit, pasi dy gjykata në Itali kundërshtuan klasifikimin e vendeve të origjinës së emigrantëve si “të sigurta” apo “të pasigurta”, duke bllokuar përkohësisht procesin.
Kryeministrja Meloni kishte paralajmëruar rifillimin e operacioneve në janar, duke deklaruar se modeli i bashkëpunimit me Shqipërinë do të jetë funksional dhe efektiv. Transferimi i emigrantëve tashmë ka rinisur, duke forcuar angazhimin mes dy vendeve për menaxhimin e krizës së migracionit.
Shëngjini dhe Gjadri do të vazhdojnë të jenë pikat kryesore për strehimin dhe akomodimin e emigrantëve, siç përcaktohet në marrëveshjen dypalëshe.
