Italia po shqyrton një propozim të ri nga partia populiste e djathtë Lega për të ndaluar mbulimin e fytyrës me burka apo veshje të tjera në hapësirat publike. Nëse ligji miratohet, Italia do t’i bashkohet një grupi shtetesh evropiane që kanë marrë masa të ngjashme, duke shkaktuar debat mbi liritë fetare dhe të drejtën për të zgjedhur mënyrën e veshjes.
Ja lista e shteteve evropiane që tashmë kanë ndaluar ose kufizuar mbulesat që fshehin fytyrën:
• Franca: E para që ndaloi burkën dhe nikabin në hapësira publike që nga viti 2010.
• Belgjika: Ndalim i plotë i mbulimit të fytyrës në publik që nga viti 2011.
• Zvicra: Vendosi ndalim në nivel kombëtar pas një referendumi në vitin 2021.
• Austri: Zbaton ndalim të mbulesave të fytyrës që nga viti 2017.
• Holanda: Kufizime në hapësira publike si shkolla, spitale dhe transport publik.
• Danimarka: Ndalim i plotë i mbulimit të fytyrës në publik që nga viti 2018.
• Bullgaria: Ligji ndalon burkën në hapësirat publike, veçanërisht për arsye sigurie.
• Gjermania: Kufizime lokale në disa lande, përfshirë ndalime për mësueset dhe në institucione të caktuara.
• Spanja: Kufizime të pjesshme në disa rajone, përfshirë Katalonjën.
• Letonia: Ndalesë për burkën dhe veshjet e ngjashme që mbulojnë fytyrën.
• Norvegjia: Kufizon mbulimin e fytyrës në shkolla dhe institucione arsimore.
• Kosova: Ndalesë në institucione publike, përfshirë shkollat.
• Luksemburgu: Kufizime për mbulesat që fshehin fytyrën në disa raste specifike.
• Bosnje dhe Hercegovina: Kufizime të pjesshme në disa zona.
Këto masa shpesh justifikohen me argumente sigurie dhe integrimi, por kanë shkaktuar kritika të shumta, sidomos për ndikimin që kanë mbi gratë muslimane dhe të drejtat e tyre. Diskutimi vazhdon të jetë i ndezur në shumë vende evropiane.
