Vitin e kaluar Policia Rrugore numëron vendosjen e mbi 500 mijë gjoba. Rekord historik po të mendohet mbi sasinë e madhe të shkeljeve të bëra në vetëm një vit nga drejtuesit e automjeteve. Për këtë, Drejtori i Përgjithshëm i Policisë së Shtetit Drejtues Madhor Ilir Proda ka "tërhequr veshin" policisë, gjatë analizës vjetore të Drejtorisë së Policisë Rrugore dhe strukturat vartëse të saj në qarqe. Në këtë mbledhje, mësohet të ketë deklaruar se: "Nuk dua sasi masash administrative dhe cilido nga ju që do t’i masë treguesit e punës me sasinë e masave administrative, automatikisht do ta lëviz nga detyra".
Për këtë drejtori i Përgjithshëm i Policisë ka kërkuar "cilësi në punë dhe të ndëshkoni ata që vërtet janë rrezik për përfshirje në ngjarje rrugore, ata që xhirojnë gomat dhe shkaktojnë ndotje akustike duke u kthyer në shqetësim për qytetarët. Ata drejtues automjetesh që parkojnë mbi trotuare, duke penguar lëvizjen e këmbësorëve dhe të nënave me karroca me fëmijë, si dhe ata që parkojnë në rrugë, duke penguar lëvizjen e lirë të automjeteve". Dhe çelësin për rregullimin e imazhit, kreu i informave blu u ka kërkuar vartësve të tij të jenë më aktivë, më prezentë në media.
