Komisioni Qendror i Zgjedhjeve (KQZ) do të mblidhet të enjten, më 21 maj 2026, për të vendosur mbi fatin e mandatit të kryetarit të Bashkisë së Kuçovës, Kreshnik Hajdari.
Sipas njoftimit zyrtar, Komisioneri Shtetëror i Zgjedhjeve do të zhvillojë nesër një seancë publike në orën 11:00, me rend dite vijimin e shqyrtimit administrativ të rezultatit të verifikimit për Hajdarin.
Ky shqyrtim vjen pasi Prokuroria e Posaçme (SPAK) i ka përcjellë zyrtarisht KQZ-së vendimin e formës së prerë të Gjykatës së Posaçme (GJKKO), e cila e shpalli fajtor Hajdarin për veprën penale “Falsifikimi i vulave, i stampave ose i formularëve”.
Kryebashkiaku socialist u dënua fillimisht me 9 muaj burgim, pasi hetimet e SPAK vërtetuan se ai kishte fshehur në formularin e dekriminalizimit një dënim të vitit 1999 nga Gjykata e Janinës në Greqi, për hyrje të paligjshme në territorin grek kur ishte i mitur (17 vjeç). Për shkak të gjykimit të shkurtuar, dënimi i tij u ul në 6 muaj burgim.
Çështja u denoncua fillimisht nga rivali i tij politik në zgjedhjet lokale, Lefter Maliqi. Edhe pse më herët KQZ nuk ia ndërpreu mandatin me argumentin se dënimi i vjetër në Greqi nuk ishte pengesë ligjore për të kandiduar, dënimi i ri i formës së prerë nga GJKKO për falsifikim formulari e ka rikthyer çështjen në tryezën e Ilirjan Celibashit, i cili të enjten pritet të japë verdiktin nëse Hajdari do ta humbasë përfundimisht mandatin e kryebashkiakut.
