Arlind Qori, përfaqësues i Lëvizjes Bashkë, ka nisur zyrtarisht mbledhjen e 5,000 firmave të nevojshme për t’u regjistruar në zgjedhjet e 11 majit 2025. Sipas Kodit Zgjedhor, partitë politike që nuk zotërojnë mandate në Kuvend duhet të sigurojnë mbështetjen e të paktën 5,000 zgjedhësve në shkallë kombëtare.
Gjatë një deklarate për mediat, Qori theksoi rëndësinë e përfshirjes qytetare në këtë proces:
“Forca jonë janë qytetarët, dhe kjo është motoja jonë. Kërkojmë mbështetjen e çdo qytetari të ndershëm, që beson në potencialin për të transformuar një herë e mirë Shqipërinë. Lëvizja Bashkë është më shumë se një parti elektorale.”
Përveç Qorit edhe “Nisma Thurje” dhe "Shqipëria bëhet" pritet të ndjekin të njëjtën procedurë për të siguruar pjesëmarrjen e tyre në zgjedhje. Procesi i mbledhjes së firmave shihet si një mundësi për të dëshmuar mbështetjen qytetare dhe për të promovuar alternativat politike të reja.
