Nuk ka surpriza. Këshilli i Lartë Gjyqësor vendosi siç ishte paralajmëruar dhe emëroi pesë ish-anëtarë të Kolegjit të Posaçëm të Apelimit në Gjykatën Administrative të Apelit dhe në Gjykatën e Apelit të Juridiksionit të Përgjithshëm.
Sokol Çomo, Ina Rama, Albana Shtylla, Natasha Mulaj dhe Mimoza Tasi u emëruan në gjykatat e apelit. Përveç Ina Ramës, e cila është magjistrate, të tjerët nuk kanë kaluar Shkollën e Magjistraturës. Emërimet janë bërë pa kaluar procesin e rivlerësimit, ndonëse pikërisht KPA ishte institucioni që vendosi fatin e qindra gjyqtarëve dhe prokurorëve gjatë reformës në drejtësi.
Sot, një proces gjyqësor mund të zgjasë 15 deri në 20 vjet. Para reformës në drejtësi, një çështje përfundonte zakonisht brenda dy viteve në të tre shkallët e gjykimit. Vetëm zbardhja e një vendimi sot mund të zgjasë dy vite, një fenomen për të cilin, sipas kritikëve, Inspektori i Lartë i Drejtësisë nuk ka reaguar.
Në mbledhjen plenare të datës 18 qershor 2026, Këshilli i Lartë Gjyqësor miratoi vendimet për emërimin dhe caktimin si gjyqtarë në nivel apeli të:
* Sokol Çomos pranë Gjykatës Administrative të Apelit;
* Ina Ramës pranë Gjykatës Administrative të Apelit;
* Albana Shtyllës pranë Gjykatës Administrative të Apelit;
* Natasha Mulajt pranë Gjykatës së Apelit të Juridiksionit të Përgjithshëm;
* Mimoza Tasi pranë Gjykatës së Apelit të Juridiksionit të Përgjithshëm.
Këta janë njerëzit që për vite me radhë kryen rivlerësimin e gjyqtarëve dhe prokurorëve, duke vendosur mbi karrierën dhe largimin e tyre nga sistemi. Tani, me vendim të KLGJ-së, ata rikthehen vetë në sistemin gjyqësor pa kaluar asnjë shkallë të vettingut.
Këta janë njerëzit që vendosën fatin e qindra gjyqtarëve dhe prokurorëve shqiptarë. Por kur erdhi radha e tyre, pesë ish-anëtarët e Kolegjit të Posaçëm të Apelimit u emëruan gjyqtarë apeli pa kaluar vetë filtrin e rivlerësimit që ata u aplikuan të tjerëve.
