Pretendimet se Shqipëria dhe Serbia mund të jenë dy vendet të cilave iu referua kryeministri malazez Milojko Spajiç kur paralajmëroi për veprimtari hibride që synojnë destabilizimin e Malit të Zi, kanë shkaktuar reagime politike në Tiranë dhe Podgoricë.
Debati nisi pas deklaratës së Spajiç, i cili tha se autoritetet malazeze disponojnë “informacione serioze operative të sigurisë” për aktivitete të koordinuara hibride, ku sipas tij janë të përfshirë zyrtarë të të paktën dy shteteve të rajonit.
Kryeministri malazez nuk përmendi emra, por deklaroi se qëllimi i këtyre aktiviteteve është destabilizimi i Malit të Zi dhe pengimi i rrugës së tij drejt Bashkimit Evropian.
Më pas, media malazeze “Vijesti”, duke iu referuar disa burimeve, raportoi se dy shtetet që Spajiç kishte parasysh ishin Shqipëria dhe Serbia.
Raportimi shkaktoi reagime edhe në politikën shqiptare. Kreu i grupit parlamentar të Partisë Demokratike, Gazment Bardhi, i cilësoi pretendimet “jashtëzakonisht serioze” dhe kërkoi nga qeveria shqiptare një përgënjeshtrim të menjëhershëm.
“Është e papranueshme që Shqipëria të lejojë të krijohet qoftë edhe përshtypja se mund të jetë pjesë e ndonjë skenari të koordinuar me Serbinë për destabilizimin e Malit të Zi”, deklaroi Bardhi.
Ministri i Jashtëm, Ferit Hoxha, hodhi poshtë pretendimet, duke deklaruar se Shqipëria nuk është dhe nuk mund të jetë pjesë e asnjë skenari destabilizues ndaj Malit të Zi apo ndonjë vendi tjetër.
Sipas Hoxhës, Shqipëria investon në bashkëpunimin, stabilitetin dhe zhvillimin rajonal, ndërsa “spekulimet, interpretimet mediatike apo debatet e brendshme politike” nuk duhet të krijojnë artificialisht probleme në marrëdhëniet mes dy vendeve.
Çështja pritet të kalojë tashmë edhe në nivelin më të lartë institucional në Malin e Zi. Presidenti Jakov Milatoviç ka thirrur për të hënën një mbledhje urgjente të Këshillit për Mbrojtje dhe Siguri. Sipas “Vijesti”, drejtuesve të sektorit të sigurisë pritet t'u kërkohen informacione të detajuara mbi pretendimet e ngritura nga Spajiç, si dhe një vlerësim i situatës së sigurisë në vend.
Ndërkohë, deklaratat e kryeministrit kanë shkaktuar përplasje edhe brenda politikës malazeze. Deputeti i Partisë Popullore Demokratike, Vladislav Bojoviç, i cilësoi ato si shenjë “pafuqie dhe paniku” përpara zgjedhjeve, duke kërkuar që, nëse qeveria disponon prova për veprimtari kundër shtetit, personat përgjegjës të kallëzohen dhe të ndiqen penalisht.
Deri më tani, pretendimi se Shqipëria dhe Serbia janë dy shtetet e përmendura në mënyrë indirekte nga Spajiç mbështetet në raportimin e “Vijesti”, ndërsa kryeministri malazez nuk i ka identifikuar publikisht vendet në fjalë.
