Erion Veliaj është rishfaqur sot pas shumë kohësh në krah të kryeministrit Rama. Në një aktivitet të zhvilluar në Kryeministri për zhvillimin e pronave publike, kryetari i bashkisë foli në sallën ku shefi i madh e ndiqte me vëmendje fjalimin e tij, por pa fshehur notat e bezdisjes. Veliaj, pa shumë dëshirë dhe pa buzëqeshjen e tij karakteristike sa herë ndodhet përballë Edi Ramës, u përpoq të shpjegonte vizionin e tij për zhvillimin e pronave publike, gjë që duhet ta ketë bezdisur jo pak Edi Ramën, i cili, me gjuhën e trupit, duart e kryqëzuara dhe vështrimet e tretura në boshllëk, duket se i dha ish-beniaminit të tij shansin e fundit për të qenë në një sallë me të.
Një aktivitet i sforcuar për të sjellë në të njëjtën sallë Veliajn, mbi të cilin rëndojnë tashmë katër akuza nga SPAK, dhe Edi Ramën, i palexueshëm qartë për qëndrimin që mban ndaj kryetarit të bashkisë. Ndonëse në konferencën e fundit për shtyp u mundua t’i dilte në mbrojtje, Edi Rama e ka të qartë se tashmë ditët e Erion Veliajt në politikë kanë përfunduar, ndërsa ato të shfaqjes në publik ia numëron Prokuroria e Posaçme.
Ndoshta krejt rastësisht, në kohën kur Elman Abule ndodhej në SPAK për të dëshmuar për çështjen që lidhet me Veliajn, ky i fundit u shfaq me Edi Ramën në të njëjtën sallë. Si një sinjal që dora e ngrohtë e kryeministrit mund të jetë e gatshme për shpatullën e Veliajt. Por që mund të jetë dhe sinjali i fundit për t’i treguar ish-bashkëpunëtorit të ngushtë se tashmë partia i ka larë duart me të. Sepse, siç e ka traditë ajo parti, “armiqtë” dhe “miqtë” ia hanë kokën njëri-tjetrit.
