Sekretariati i Etikës ka vendosur përjashtimin me 60 ditë të deputetit dhe kreut të Partisë Mundësia, Agron Shehaj, pas incidentit të ndodhur gjatë seancës plenare.
Vendimi vjen pasi Shehaj mori nga salla e Kuvendit një dokument që mazhoranca e cilësoi si marrëveshje konfidenciale mes Shqipërisë dhe Shteteve të Bashkuara të Amerikës për financimin ushtarak, duke u larguar më pas nga seanca.
Pas ngjarjes, Partia Socialiste depozitoi kërkesën për përjashtimin e tij me 60 ditë, duke argumentuar se deputeti kishte shkelur rregulloren e Kuvendit gjatë shqyrtimit të projektligjit për ratifikimin e marrëveshjes.
Sekretariati i Etikës shqyrtoi kërkesën dhe vendosi përjashtimin e Agron Shehajt nga punimet e Kuvendit për një periudhë 60-ditore.
