Buxheti i kërkuar nga Institucioni i Presidencës për vitin 2024, në vlerën e 644 milionë lekëve, ka nxitur debate të ashpra në Komisionin Parlamentar të Ligjeve. Sekretarja e Përgjithshme e Presidencës, Valbona Lusha, shpjegoi se në këtë buxhet janë përfshirë shpenzime të rëndësishme, si rikonstruksioni i godinës që do të kushtojë 360 milionë lekë, si dhe blerja e automjeteve dhe orendive për zyrat.
Deputetja e Partisë Demokratike dhe nënkryetarja e Komisionit, Dhurata Çupi, kritikoi kërkesën për fondet e rikonstruksionit dhe për shtesën prej 36 milionë lekësh për automjete të reja. Ajo theksoi se ndërhyrja në ndërtesën e Presidencës mund të dëmtojë trashëgiminë kulturore, pasi objekti është i listuar si një godinë historike e mbrojtur.
“Këtë herë kërkohen 3 milionë euro nga Presidenti. Janë 3 milionë euro që do zhbëjnë një trashëgimi kulturore. A po cenoni trashëgiminë kulturore dhe historike të Presidencës? Sepse një investim kaq i madh është i pamundur të mos e preki trashëgiminë. Është një godinë e hershme dhe e listuar si trashëgimi kulturore,” deklaroi Çupi.
Ajo gjithashtu ngriti pyetjen nëse fondet e kërkuara janë një formë shpërblimi për Presidentin, duke sugjeruar se dekreti i disa ligjeve që më pas janë shpallur antikushtetuese mund të ketë ndikuar në këtë kërkesë financiare. “A e keni këtë buxhet 3 milionë euro si shpërblim për shërbimin që i keni bërë mazhorancës?” – vijoi ajo.
