Sali Berisha nuk i është përgjigjur sot pyetjes nëse PD do të organizojë primaret e premtuara prej tij. Pas daljes nga zyrat e SPAK, i pyetur për zhvillimin e primareve, ai tha se “koha premton që të zhvillohen, por ju, siç e shihni, PD me betejën e saj me narkodiktaturën është në akte të fuqishme antidiktatoriale. Unë do vija vetë këtu po mos më thërrisnin, po ja që më thirrën. Se unë do i paraqisja këto”.
Klodiana Lala: Do ketë apo jo primare?
Berisha: Fillimi i paraqitjes së dokumentave. Keni për të parë ju.
Klodiana Lala: Do ketë apo jo primare?
Berisha: Vepron censura, mediat proqeveritare nuk do e japin.
Klodiana Lala: Do ketë primare apo jo?
Berisha: Nejse katër mediat e qeverisë.
Klodiana Lala: Zoti Berisha, s’më dhatë përgjigje nëse do ketë primare apo jo.
Qartas duket e largët dita kur PD do të zhvillojë primaret për listën e deputetëve për zgjedhjet e ardhshme të 11 majit. Edhe pse një proces tejet i rëndësishëm në kohën kur listat e mbyllura favorizojnë zgjedhjen e emrave nga kryetarët, moszhvillimi i primareve e shndërron PD në “pronën” ekskluzive të Sali Berishës për të vendosur listën e ardhshme të deputetëve. 4 muaj para zgjedhjeve, PD po tërhiqet zvarrë nga hallet e kryetarit të saj, duke mos pasur asnjë mundësi apo hapësirë për të folur për alternativën, programin apo figurat e reja që do e përfaqësojnë në fushatën elektorale.
