Federata Shqiptare e Futbollit ka intensifikuar interesimin për dy futbollistë të rinj që po spikasin në futbollin zviceran, Lutfi Dalipin e Vaduzit dhe Samuel Krasniqin e Grasshoppersit.
Presidenti i FSHF-së, Armand Duka, së bashku me përzgjedhësin e Kombëtares, Ronaldo Maran, ishin të pranishëm në stadium për të ndjekur nga afër dy lojtarët në përballjen mes Grasshoppersit dhe Vaduzit, e cila përfundoi në barazim 2-2. Të dy futbollistët zhvilluan paraqitje solide, duke tërhequr vëmendjen e delegacionit shqiptar.
Prania e përfaqësuesve të FSHF-së ka vënë në lëvizje edhe median zvicerane. Gazeta “Blick” i ka kushtuar vëmendje interesimit të Shqipërisë, duke ngritur shqetësimin se Federata Zvicerane duhet të reagojë për të mos rrezikuar humbjen e dy lojtarëve që së fundmi kanë qenë pjesë e Zvicrës U21. Sipas medias zvicerane, delegacioni shqiptar ishte në tribunë pikërisht për të vëzhguar Dalipin dhe Krasniqin.
Interesimi i Shqipërisë ka surprizuar edhe trajnerin e Vaduzit, Marc Schneider, i cili ka kërkuar që futbollisti të mos vihet nën presion. “Problemi është se askush nuk e njihte Lutfin në verë dhe tani ka shumë zhurmë. Nuk është e lehtë për të, mund ta shihni. Duhet ta mbrojmë”, u shpreh ai.
Në të njëjtën linjë për nevojën për të mbrojtur lojtarët nga presioni është edhe trajneri i Grasshoppersit, Olaf Janssen. Ai deklaroi se përpiqet t’ia lehtësojë situatën Krasniqit, ndërsa shprehu bindjen se futbollisti nuk do ta ndryshojë qëndrimin e tij. “Secili futbollist e ëndërron kombëtaren që në moshë të re. Të shohim nëse sjellja e lojtarëve do të ndryshojë apo do të mbetet e njëjtë. Po provoj t’ia largoj presionin. Ai ka nevojë për mbështetjen time dhe të ekipit”, deklaroi Janssen.
Përveç Zvicrës dhe Shqipërisë, të dy futbollistët kanë gjithashtu të drejtë të përfaqësojnë Kosovën. Megjithatë, deri më tani as Dalipi dhe as Krasniqi nuk kanë marrë një vendim përfundimtar se me cilën kombëtare do të luajnë në të ardhmen.
