Autoritetet franceze kanë nisur një hetim për tentativë vrasjeje ndaj një oficeri policie, pasi gjatë protestave të së shtunës në Paris u hodhën bomba molotov kundër forcave të rendit. Demonstratat, të udhëhequra kryesisht nga të rinjtë, përfunduan me përplasje të dhunshme dhe qindra të arrestuar.
Rreth 320 mijë qytetarë dolën në rrugët e Parisit, Marsejës, Grenoble, Bordeaux, Lyon dhe Toulouse për të protestuar kundër kostos së lartë të jetesës, krizës së strehimit, përkeqësimit të shërbimeve publike dhe mungesës së perspektivës ekonomike për të rinjtë.
Një pjesë e protestuesve kishin zgjedhur të dilnin në rrugë me kostume të Halloween-it, por atmosfera ndryshoi gjatë mbrëmjes së të shtunës, kur pas përfundimit të tubimeve grupe personash të maskuar u përplasën me policinë.
Ministri i Brendshëm francez, Laurent Nuñez, e cilësoi nivelin e dhunës si të jashtëzakonshëm. Sipas autoriteteve, më shumë se 770 persona u arrestuan në të gjithë vendin.
Incidenti më i rëndë u regjistrua në Paris, ku mjete zjarrvënëse u hodhën drejt një grupi prej rreth 15 policësh dhe xhandarësh. Prokuroria njoftoi hapjen e një hetimi për “tentativë vrasjeje ndaj personave të veshur me autoritet publik”.
Nga sulmi janë raportuar të plagosur me djegie të shkallës së dytë. Momenti i incidentit është filmuar me telefona celularë dhe pamjet janë shpërndarë në rrjetet sociale, si dhe janë transmetuar nga televizionet franceze.
Megjithatë, sipas autoriteteve, niveli i dhunës fizike dhe i plaçkitjeve ishte më i ulët krahasuar me protestat e 17 tetorit, kur u arrestuan 2,600 persona dhe u plaçkitën deri në 3,000 dyqane, në një nga netët më të dhunshme të trazirave urbane në historinë e fundit të Francës.
Protestat e kësaj vjeshte kanë nxjerrë në pah pakënaqësinë në rritje të të rinjve ndaj kushteve ekonomike dhe sociale, ndërsa përplasjet e fundit kanë shtuar presionin mbi autoritetet franceze për të garantuar rendin publik pa cenuar të drejtën e protestës.
