Byroja Federale e Hetimeve në SHBA ka identifikuar Korenë e Veriut si përgjegjëse për sulmin e madh kibernetik ndaj platformës së këmbimit të kriptovalutave Binance, ku u vodhën asete digjitale me vlerë 6.3 miliardë dollarë. Sipas autoriteteve amerikane, pas operacionit qëndron grupi i hakerëve “TraderTraitor”, i lidhur me strukturat kibernetike të regjimit të Phenianit.
Sipas FBI-së, sulmi ndodhi më 29 tetor 2026 dhe ishte një operacion i sofistikuar, gjatë të cilit hakerët arritën të depërtonin në sistemet e platformës dhe të kryenin tërheqje të paautorizuara nga kuletat e saj digjitale. Agjencia amerikane bëri të ditur se grupi “TraderTraitor” ka nisur konvertimin e aseteve të vjedhura në kriptovalutën Ethereum, ndërsa pritet që më pas ato të pastrohen përmes platformave të financave të decentralizuara dhe shërbimeve të këmbimit të menjëhershëm të kriptovalutave.
“TraderTraitor” është një grup hakerësh i sponsorizuar nga shteti i Koresë së Veriut, të cilin autoritetet amerikane e kanë lidhur me vjedhje të kriptovalutave dhe sulme kibernetike prej vitit 2020. Grupi konsiderohet pjesë e rrjetit “Lazarus”, i njohur për sulmet ndaj kompanive të teknologjisë blockchain dhe platformave të kriptovalutave, përmes mashtrimeve elektronike dhe programeve keqdashëse.
Pas sulmit, Binance pezulloi përkohësisht depozitat dhe tërheqjet, ndërsa ekipet e sigurisë nisën hetimet dhe bashkëpunimin me autoritetet dhe kompanitë e specializuara për gjurmimin e transaksioneve. Sipas raportimeve, rreth 3 miliardë dollarë nga asetet e prekura janë identifikuar dhe ngrirë nga Binance dhe partnerët e saj.
Kompania njoftoi fillimisht se kishte zëvendësuar rreth 90 për qind të shumës së prekur nga sulmi, duke përdorur fondet e veta, rezervën e sigurimit për përdoruesit dhe fondet e tjera të kompanisë. Megjithatë, në përditësimin e fundit të publikuar të dielën, Binance bëri të ditur se kishte mbuluar tashmë rreth 95 për qind të humbjeve dhe kishte nisur rikthimin gradual të tërheqjeve të kriptovalutave. Pjesa e mbetur përbëhet nga asete me likuiditet më të ulët, të cilat kërkojnë më shumë kohë për t'u siguruar në sasinë e nevojshme.
Bashkëdrejtori ekzekutiv i Binance, Richard Teng, ka garantuar se përdoruesit nuk do të përballojnë pasojat financiare të sulmit dhe se kompania do të mbulojë të gjithë shumën e prekur. “Pasuritë tuaja janë të sigurta”, është mesazhi i përcjellë nga drejtuesi i platformës për klientët.
