Kryeministri Edi Rama ka mbledhur kryesinë e Partisë Socialiste dhe drejtuesit politikë të qarqeve në selinë rozë, ku fokusi kryesor ka qenë përgatitja për zgjedhjet parlamentare të 11 majit, me theks të veçantë tek vota e diasporës.
Në prag të fillimit të procesit të regjistrimit për emigrantët që dëshirojnë të votojnë, Rama u ka kërkuar drejtuesve politikë të krijojnë një bazë të dhënash me kontaktet e shqiptarëve që jetojnë jashtë vendit, për të maksimizuar votën e diasporës në favor të mazhorancës.
Në mbledhje janë bërë edhe disa ndryshime në drejtimin politik të qarqeve. Eduard Shalsi është emëruar drejtues i PS-së për qarkun e Kukësit, duke zëvendësuar Pandel Majkon, i cili do të transferohet në Tiranë. Majkos do t’i caktohet një zonë elektorale në kryeqytet, ndërsa Blendi Gonxhe do të jetë përgjegjës për zonën e Kombinatit.
