Kryetari i bashkisë së Tiranës, Erion Veliaj, është shfaqur sot në media në një video ku u ka shpjeguar pensionistëve prioritetet që do kenë në transportin urban. Por mesa duket qëllimi i vërtetë i publikimit të një videoje tipike nga ato që bashkia e Tiranës shpërndan ka qenë një mesazh që Veliaj i ka dërguar “kolegeve” të SPAK-ut.
“Nuk dorëzohem, mos ki merak! E di për çfarë ma thua, por nuk dorëzohem. Po të duan, le ta marrin me votë, por me hile e anonime jo… Po t’i kenë votat, e lë vetë dhe iki, por… S’ta fal njeri suksesin, meazallah!” – u thotë ndër të tjera Veliaj pensionistëve të dekorit të videos së tij.
Por qartas asnjë prej tyre nuk e kupton se ç’lidhje ka çmimi i abonesë me fjalimin në jerm të kryetarit të bashkisë:
“Nuk dorëzohem unë me këta personazhe, se nuk e meritojnë! U them këtyre shokëve të mi – se kemi shokë edhe nga e djathta, kemi qenë në një shkollë bashkë – po më thatë që keni ndërtuar një shkollë të re, e lë unë këtë punë që tani, se do të thotë që dini të bëni një punë.
Por, të mos kesh bërë asnjë shkollë e t’i thuash tjetrit që ka ndërtuar 45, rri tani ti, hajde me letra anonime! Ua thashë, iku ai sistemi i letrave anonime. Po jeni burra, shkoni te fleta e votimit, nëse keni vota dhe mbështetje në popull. Megjithatë, duhet ecur përpara” – vazhdoi më tej Veliaj që mesa duket i ka ngecur filmi tek denoncuesi anonim në SPAK.
Edhe pse vetë kryetari i bashkisë e di se denoncuesit i mbrohet identiteti ndërkohë që hetimet vazhdojnë, është e paqartë pse vazhdon i bie fyellit në një vrimë që as e ndihmon në publik dhe as e shpëton nga akuzat. SPAK deklaroi pak ditë më parë se po e heton Erion Veliajn për 4 akuza.
