Mbështetës të PD kanë shpërndarë një thirrje për protestë ditën e hënë, më 9 janar, në orën 9:30, përpara selisë së SPAK-ut (SKAP-it, siç referohet në mesazh). Kjo protestë synon të denoncojë atë që PD e konsideron si përndjekje politike ndaj kundërshtarëve të kryeministrit Edi Rama.
Në mesazhin e shpërndarë për strukturat e degëve thuhet:
“Të mobilizojmë të gjitha strukturat e degëve për të protestuar përpara SPAK-ut si vegël në duart e Ramës për të përndjekur kundërshtarët politik. Do jemi aty në mbështetje të së drejtës, të ligjit dhe së vërtetës që është në anën e Kryetarit të PD, Prof. Dr. Sali Berisha. Në ora 9:30 përpara selisë së SPAK-ut.”
Ndërkohë, ish-kryeministri Sali Berisha ka deklaruar se do të respektojë vendimin e Gjykatës së Apelit të GJKKO-së, e cila i ka caktuar masën e sigurisë “detyrim paraqitjeje”.
