Kryetari i Partisë Demokratike, Sali Berisha, u paraqit sot në SPAK pas masës së sigurisë “Detyrim paraqitje” të vendosur nga Apeli i GJKKO në lidhje me çështjen e njohur si “Afera Partizani”. Në një deklaratë për mediat, Berisha sulmoi kreun e SPAK, Altin Dumani, duke e akuzuar si kryekriminel elektoral dhe si një figurë që po mbulon dosje krimi.
"Dumani është kryekriminel elektoral sepse ka mbyllur të gjitha dosjet e krimit monstruoz kriminal. Aty gjeta McGonigal-in që po i bënte kurs Dumanit, po i bënte kurs. Mund t’ju duket çudi por kjo është e vërteta. Nuk e solla unë McGonigalin që të japë leksione këtu, por kjo është e vërteta. Organizata kriminale SPKAP po manipulon drejtësinë. Ata thonë se apartamenti është blerë për 380 metra katrorë, ndërsa ekspertët e vlerësojnë për 500 metra katrorë. Kjo është farsë dhe mashtrim,” deklaroi Berisha.
Ai u shpreh i vendosur për të vijuar betejën e tij kundër asaj që e quajti “drejtësi e kapur nga krimi”.
Ndërkohë, jashtë Prokurorisë së Posaçme u mblodhën dhjetëra mbështetës të Partisë Demokratike, të cilët brohorisnin thirrje si “Poshtë diktatura” në shenjë solidariteti me liderin e tyre. Masat e sigurisë ishin të shtuara, ndërsa Berisha qëndroi në ambientet e SPAK vetëm për pak minuta.
