Kreu i Partisë Demokratike, Sali Berisha, ka ngritur akuza serioze ndaj Taulant Ballës, duke pretenduar për ndërhyrje të këtij të fundit në sistemin e drejtësisë dhe vendimmarrjen për tendera.
Gjatë një deklarate për gazetarët para SPAK, Berisha publikoi mesazhe të pretenduara mes Ballës dhe një anëtari të bandës së Elbasanit. Sipas tij, këto mesazhe tregojnë për një marrëveshje kriminale mes palëve për të arrestuar kundërshtarët dhe për të siguruar vota.
“Më datën 10/02/2020, ‘Target’, njëri nga banditët e bandës së Elbasanit, informoi se kishin rënë dakord të mos i kërkonin Taos tendera publikë apo favore të tjera, përveç atyre që kishin rënë dakord më parë. Tao (Taulant Balla) u përgjigj: ‘A garantoni se të gjithë ata njerëz do të votojnë për ne nëse vendosim në listë ata që doni në burg?’ Përgjigja ishte: ‘Po, ne e garantojmë këtë’,” tha Berisha.
Ai pretendon se kjo marrëveshje çoi në arrestimin e Çapjave më 24-25 mars 2021 me kërkesë të Çelëve. “Tao është një kriminel. Ky është vetëm njëri nga të shumtat raste në dosjen e tij. Ai përcakton tenderat dhe vendimet e gjykatave,” shtoi Berisha.
