Dy ngjarje të mundshme kriminale me pasoja për jetën janë parandaluar falë ndërhyrjes së menjëhershme të shërbimeve të Policisë së Vlorës. Si rezultat, janë arrestuar në flagrancë dy autorë të dyshuar për plagosje të rëndë të dy shtetasve.
Sipas Policisë, në lagjen “Kushtrimi”, rreth orës 19:30 të mbrëmjes së djeshme, gjatë një konflikti për motive të dobëta, 23-vjeçari O. Xh. dyshohet se ka goditur me levë hekuri në kokë 33-vjeçarin E. D., i cili ndodhet nën kujdesin e mjekëve, jashtë rrezikut për jetën.
Ndërkohë, në lagjen “Uji i Ftohtë”, rreth orës 19:45, 56-vjeçari E. Z. dyshohet se ka goditur me thikë 64-vjeçarin M. I., pas një konflikti për motive të dobëta. Edhe ky i fundit ndodhet jashtë rrezikut për jetën, nën kujdesin e mjekëve.
Policia bën me dije se materialet procedurale për të dyja rastet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.
