Gjykata e Apelit të Posaçëm la në fuqi dënimin me 25 vite burgim për të “fortin” e Myslym Shyrit, Gjergj Cukali. Ai u cilësua fajtor për vrasje me tentativë ndaj Gjon Menës, të cilin tentoi ta ekzekutonte përmes shpërthimit me eksploziv, ngjarje e ndodhur më 9 shkurt 2021. Cukali u cilësua fajtor edhe për akuzat e shkatërrimit të pronës me eksploziv dhe grupit kriminal.
Enver Jamaku, i penduar i drejtësisë, i cili bashkëpunoi me SPAK dhe zbardhi krimet e rënda, u dënua përfundimisht me 7 vite dënim. Ai tha se Cukali i premtoi 30 mijë euro për vendosjen e tritolit të Gjon Mena.
Kushëriri i Enver Jamakut, Ermond Jamaku, po ashtu u dënua me 8 vite, pasi dha ndihmë për SPAK në hedhjen dritë mbi ngjarjet e rënda kriminale.
Apeli zbuti masën e dënimit nga 20 në 18 vite burgim për Blendi Dedën, për tentativën për të vrarë Artion Bylykyn me shpërthim eksplozivi.
Bylyku është kunati i Domart Konjarit, një prej trafikantëve më të mëdhenj të kokainës, që dyshohet se qëndron pas vrasjes së Devi Kasmit. Blendi Deda, si dhe të pandehurit Paris Prenga e F. Abazi, miq të ngushtë të Devi Kasmit, tentuan të merrnin hak për vrasjen e tij dhe tentuan eliminimin e kunatit të Konjarit.
