Vazhdimi ose jo mandati i kreybashkiakut të Kuçovës, Kreshnik Hajdari po kthehet në një skenë komike.
Sot, Komisioni i Ankesave dhe Sanksioneve në KQZ, urdhëroi Komisionerin Shtetëror të Zgjedhjeve, Ilirjan Celibashi t’i rikthehet çështjes dhe të marrë një vendim nëse mandati i Hajdarit do të vijojë apo do të ndërpritet sipas ligjit të dekriminalizimit, pasi u dënua me 6 muaj burg për fshehjen e një dënimi në Greqi.
Po si u tërhoq nga vendimi Celibashi?
Lefter Maliqi bëri një betejë të gjatë në drejtësi e më pas në KQZ, për të kërkuar shkarkimin e kryebashkiakut të Kuçovës, pasi u dënua për një fshehje dënimi.
Por ditën kur Ilirjan Celibashi do të merrte vendimin, avokati i Maliqit bërë një lëvizje autogol.
Ai kërko që Celibashi të përjashtohej nga vendimmarrja, sepse më herët kishte mbajtur anën e Kreshnik Hajdarit.
Kreu i KQZ e pranoi kërkesën e Maliqit, dhe hoqi dorë nga vendimi, çka krijoi një situatë absurde, sepse Celibashi është i vetmi që mund ta marrë një vendim për dekriminalizimin lidhur me vijimin ose jo të mandatit.
Tashmë, pasi janë menduar disa ditë, Maliqi dhe avokatët e tij janë rikthyer në KQZ, dhe ankohen në KAS, pse Celibashi pranoi kërkesën e tyre duke mos dhënë vendim.
Në Komisionin e Ankesave dhe Sanksioneve, dosja i ra si relator Ilir Rusmalit, i cili komunikoi edhe vendimin për ta rikthyer dosjen në dorë të Celibashit.
Kur Avokati i Maliqit u pyet nga KAS se pse kërkoi tërheqjen e Celibashit kur taktikisht nuk kishte kush tjetër të jepte vendimin, përgjigjia e tij ishte: Unë mund t'i kërkoja edhe të hidhej nga 15 katëshi, do ta bënte ai?
