E prezantuar nga ministri i drejtësisë më dhjetor 2025 në prag të festave , aministia penale pritet të marrë dritë jeshile pas 6 muajsh.
Kuvendi ka caktuar seancën e 18 qershorit për ta votuar atë, pasi kjo periudhë u përdor për të marrë dritën jeshile nga Bashkimi Evropian.
Ministri i ri drejtësisë, Toni Gogu e prezantoi amnistinë në komisionin e ligjeve ku specifikoi kategoritë që përfitojnë, duke thënë se askush që është subjekt i SPAK, nuk do të falet nga ky ligj i ri.
Rreth 380 persona përfitojnë lirimin e menjëhershëm dhe rreth 900 të tjera përfitojnë ulje dënimi, nëse zbatohen të njëjtat kritere të përcaktuara në këtë ligj.
“Standardi i BE-së është që, të mos tolerohen, krimet e rënda, korrupsioni, terrorizmi dhe krimet zgjedhore, dhe ky standard do të përmbushet. Përjashtohen vrasjet në rrethana cilësuese, krimet seksuale, korrupsioni dhe krimi i organizuar, krimet zgjedhore, pastrimi i parave, dhe çdo subjekt që është nën juridiksionin e SPAK dhe GJKKO, përjashtohen nga amnistia”,-tha Gogu.
Detaje konkrete nga amnistia
· amnistia për ndjekje penale, pushon procedimi për veprat që dënohen deri në 3 vjet burg
· të gjithë të dënuarit e tjerë marrin 1 vit ulje, gratë dhe të miturit 1.5 vite
· të miturit kur kanë qenë nën 18 vjet kur kanë kryer krimin, lirohen menjëherë
· të gjithë burrat 60 vjeç e sipër, dhe të gjitha gratë 50 vjeç e sipër lirohen menjëherë
· të gjitha gratë që janë dënuar deri në 4 vjet, ose u kanë mbetur më pak se 4 vjet, lirohen menjëherë
· të gjithë burrat që janë dënuar deri në 3 vjet, ose u kanë mbetur për të vuajtur më pak se tre vjet lirohen menjëherë
Ministri Gogu, shtoi se nëpërmjet zbatimit të amnistisë, një nga efektet kryesore është edhe ulja e numrit të të dënuarve në institucionet penitenciare.
“Ulja e numrit të personave të burgosur përmirëson kushtet në këto institucione, duke garantuar trajtimin e tyre në përputhje me rregullat evropiane të burgjeve. Aktualisht, në sistemin e burgjeve janë të akomoduar gjithsej 4 982 persona, nga të cilët 1 827 të dënuar dhe 2 629 të paraburgosur”,-tha ministri i drejtësisë.
