Kryeministri Edi Rama ka sulmuar sot blogerët, influencerët, analistët dhe gazetarët kritikë gjatë një takimi me socialistët në Elbasan, ku mbrojti projektin e investimit në Zvërnec dhe reagoi ndaj akuzave për korrupsion.
Duke iu referuar flamingove, të cilat janë kthyer në simbol të protestave kundër projektit, Rama tha se ato janë vrarë ndër vite nga gjuetarët dhe personat që kanë dëmtuar natyrën.
Më pas ai kaloi në sulme ndaj blogerëve dhe influencerëve, për të cilët tha se fitojnë para duke ekspozuar trupin në rrjetet sociale dhe nuk paguajnë taksa.
“Na tregojnë këta korrupsionin. Na e tregojnë korrupsionin blogerët që nuk lënë para pa mbledhur duke treguar të gjitha anët e trupit, që unë i kam treguar pa lekë kur isha i ri dhe që nuk i japin 1 euro taksë shtetit shqiptar”, deklaroi Rama.
Kreu i qeverisë sulmoi edhe analistë e gazetarë, të cilët sipas tij marrin para nën dorë dhe nuk deklarojnë të ardhurat, ndërsa përmendi me emër edhe Mustafa Nanon, ish-ambasadorin shqiptar në Zvicër.
Rama ironizoi ish-diplomatin për kritikat ndaj qeverisë dhe hodhi poshtë pretendimet se oligarkët kanë akses të privilegjuar në zyrën e tij.
Deklaratat u bënë gjatë një takimi të Partisë Socialiste në Elbasan, ndërsa debati për projektin turistik në Zvërnec dhe protestat kundër tij vijon të mbetet në qendër të përplasjes politike.
